నా గురించి

నా ఫోటో
ఈ బ్లాగ్ ద్వారా కొన్ని తెలుసుకోవలసిన తెలుగు పద్యాల సాహిత్యాన్ని, కొంత ఆద్యాత్మిక విషయాలను రీడర్స్ కు పరిచయం చేయ్యాలని అనుకుంటున్నాను ప్రతి వ్యాసానికి ఎక్కడో ఒకచోట సందర్భోచితంగా లలిత స్మరణం ఉంటుంది. ఈ విధంగా ఈ బ్లాగ్ లలితాంకితం అవుతూ మిమ్మలను పులకాంకితం చేస్తుంది. ఈ బ్లాగ్ లో చాలావరకు వ్యాకరణ దోషాలు లేకుండా చూసుకొన్నాను. ఏమైనా అచ్చు తప్పులు ఉంటె క్షమించి. భావం లోనే తప్పులు ఉంటె తెలియపరచ గలరు. రీడర్స్ ఈ బ్లాగ్ ద్వారా తమ అభిప్రాయాలను, ఆలోచనలను వ్యాఖ్యల ద్వారా పంచుకుంటారని ఆశిస్తున్నాను. మీ సలహాలకు నా సవరణలు, సందేహాలకు నా వివరణలు ఉంటాయి.

నాద గణపతి

నాద గణపతి

              గణపతి కి ఇంకొక నామం విఘ్నేశ్వరుడు. నా చిన్న అనుభవం ఒకటి చెప్పి నాద గణపతి వ్యాసాన్ని కొనసాగిద్దాం. వినాయక నవరాత్రులలో హైదరాబాద్ లో ఒక ఇంటికి వెళ్ళవలసి వచ్చింది. ఆ ఇంటికి ఎటుతిరిగి వెళ్ళాలన్న ఆ వీధికి ఒక వినాయక మండపం వీధిని మూసేసి అడ్డంగా ఉండేది. ఇలాంటి పరిస్టితి చాలామందికి ఎదురై ఉండవచ్చు. సామాన్యంగా అందరికి విఘ్నేశ్వరుడు అంటే విఘ్నాలు(ఆటంకాలు) కలగకుండా చుసేవాడని నమ్మకం. మొత్తానికి వినాయక నవరాత్రులలో ప్రయాణానికి విఘ్నేశ్వరుడే విఘ్నం అయ్యాడు అని నాకు అనిపించింది.


నిజానికి విఘ్నేశ్వర శబ్దానికి అర్ధం విఘ్నాలకు అధిపతి అని. విఘ్నాలు లేకుండా చేసేవాడు అని అర్ధం కాదు. విఘ్నాలు ఈయన అధీనంలో ఉండి ఈయన చెప్పినట్టు వింటాయి. కాబట్టి ఈయన విఘ్నాలను కలిగించవచ్చు  లేక కలగకుండా చూడవచ్చు. రావణునికి ఆత్మలింగం లభించకుండా విఘ్నం కలిగించింది గణపతే. ఈ విధంగా విఘ్నం కలిగిస్తూ కూడా గణపతి లోకకల్యాణం చేస్తూ ఉన్నాడు. ఇది విఘ్నేశ్వర నామం అర్ధం మన వ్యాసానికి నేపద్యం. ఇప్పుడు మన వ్యాసం నాద గణపతి లోనికి వద్దాం. 
               వ్యాసం శీర్షిక నాద గణపతి. అంటే నాదానికి కారణమయ్యే గణపతిని తెలుసుకొందాం. నాదం అంటే ఒక క్రమబద్దమైన శబ్దం. ఇక్కడ శబ్దాన్ని క్రమబద్దీకరించే గణపతిని నాద గణపతి అనుకొందాం.  శబ్దం రావటానికి కారణం గాలి. ఆ గాలికి కి విఘ్నాలు కలిగించటం ద్వారా నాదం పుడుతుంది. ఇది కొంచం కొత్తగా ఉండచ్చు కానీ ఎలా అంటే ఉదాహరణకు వేణువు నుంచి వేణు నాదం రావాలంటే వేణువు లోకి గాలిని ఊది, దాని రంద్రాలలో వేళ్ళతో ఒక క్రమ పద్దతిలో విఘ్నాలను కలిగిస్తూ ఉంటే శ్రావ్యమైన వేణునాదం వినిపిస్తుంది. విఘ్నాలు కలిగించక పోతే ఒకే శబ్దం వస్తుంది. ఇప్పుడు మనం మాట్లాడే మాటలు(అక్షరాలు, పదాలు)  కూడా శబ్దం నుంచి వచ్చిన నాదాలే. కాబట్టి ఈ నాదాలు ఉద్బవించటానికి, ధ్వనికి విఘ్నం కలిగించి నాదం కలిగించేది ఎవరు అనేది తెలుసుకొందాం.

నాదాన్ని పరబ్రహ్మ స్వరూపం గా భావిస్తారు.

పరమేశ్వరుని

నాదయుతో మహా సిత వపు: అని ఆది శంకరులు,నాద తనుం అనిశం శంకరం అని త్యాగరాజు,శంకరా నాద శరీర హరా అని వేటూరి గారు కూడా కీర్తించారు.

లలితా సహస్ర నామం లో రెండు నామాలు అమ్మవారిని నాద రూపంగా చెప్పాయి.

వీర గోష్టి ప్రియా వీరా నైష్కర్మ్యా నాద రూపిణి

నారాయణీ నాదరూపా నామరూప వివర్జితా

 ఈ విధం గా ప్రకృతి పురుషులు ఐన పార్వతి పరమేశ్వరులు ఇద్దరు నాద స్వరూపులు .


 గణపత్యథర్వ శీర్షోపనిషత్ లో గణపతి గురించి " ఆవిర్భూతం చ సృష్ట్యాదౌ ప్రకృతే: పురుషాత్పరమ్ " అని , అంటే ప్రకృతి పురుషులకంటే ముందు సృష్టి ఆదిలో ఆవిర్భవించినవానిగా తెల్పింది.

అంతే కాక

 "త్వం మూలాధార స్థితో సి నిత్యం",

త్వం చత్వారి వాక్ పదాని ” ,

అనే మంత్రాలను ప్రస్తావించింది. షట్చక్రాలలో మొదటిదైన మూలాధార చక్రం గణపతి స్థానంగా చెప్పబడింది. "చత్వారి వాక్ పదాని" అనే పదం ద్వారా వాక్కు నాలుగు రూపాలలో ఉంటుందని తెలుసుకోవచ్చు . అవి పరా , ప్రత్యక్ , మధ్యమ , వైఖరి . ఈ నాలుగు రూపాంతరాలు మనం లలితా సహస్ర నామాలలో గమనించవచ్చు . 

పరా, ప్రత్యక్చితీ రూపా, పశ్యంతీ, పరదేవతా |
మధ్యమా, వైఖరీరూపా, భక్తమానస హంసికా॥ 

మూలాధారంలో పరా రూపంలో జనించిన శబ్దం తర్వాత రెండు రూపాలలోకి మారుతూ చివరిదైన వైఖరి రూపం లో మనచే పలుకబడుతుంది. 

మూలాధార చక్రం లో వాయువు రూపంలో శబ్దం పుడుతుంది. ఈ వాయువు వైఖరి గా మారటానికి ఎన్నో అడ్డంకులు అవసరమవుతాయి .  ఉదాహరణకు వేణువు మొదటి రంద్రంలో ప్రవేశించిన గాలి మిగిలిన రంద్రాలలో కలిగిన అడ్డంకుల వలన వేణునాదం పుడుతుంది. అదేవిధంగా మొదటి చక్రం ఐన మూలాధారంలో పరా అనే వాయువుకు విఘ్నాలు కలిగించి వైఖరి అనే మన వాక్కుకు కారణభూతుడు నాద గణపతి. కాబట్టి గణపతి విఘ్న నాశకుడు మాత్రమే కాకుండా విఘకారకుడుగా కూడా ఉండి విఘ్నేశ్వరుడు అవుతున్నాడు. 

ఈ నాలుగు రూపాలైన వాక్కుల యొక్క స్వభావం ఋగ్వేదంలోని సరస్వతి సూక్తం లోని మంత్రం తెలుపుతుంది. 

  ఈ మంత్రం ద్వారా వాక్కు కు నాలుగు రూపాతాన్తరాలని, మొదటి మూడు మానవునకు తెలియనివి (గుహా త్రీణి) అని. నాల్గవదైన (తురీయం వాచో) వైఖరి ని మానవులు పలుకుతున్నారని తెలుపబడుతుంది. 

ఈ విధం గా దేవి రూపం ఐన వాక్కుకు గణపతి కారణం అవుతూ నాద గణపతి అవుతున్నాడు.

 

 


ఈ పోస్ట్ పై  మీ విలువైన సలహాలకు సవరణలు, సందేహాలకు వివరణలు తప్పకుండా ఉంటాయి 
Note: the red lettered words are from Lalitha sahasra nama strotram 

- : నాంపల్లి రామకోటేశ్వర్
గండేపల్లి

వేద గణపతి : మహాగణపతి

గణపతి 

           గణపతి తెలియని భారతీయుడు ఉండడు. గణపతి పేరు వినగానే అందరకి గుర్తు వచ్చే రూపం ఏనుగు తల(గజముఖం),పెద్ద పొట్ట (లంబోదరం) మరుగుజ్జు (వికట). మన అందరికి గణపతి శివ పార్వతుల తనయుడుగ తెలుసు . 

   ఇంకా బ్రహ్మాండ పురాణం లోని లలితా సహస్రనామ స్తోత్రం లోని ఒక నామం " కామేశ్వర ముఖాలోక కల్పిత శ్రీ గణేశ్వరా " అని అమ్మవారు ఈశ్వరుని ముఖం చూడటం ద్వారా గణపతిని ఉద్బవింప చేసి విఘ్నయంత్ర   చేదన  చేసిందని  ఉన్నది. ఇవి కాక గణపతిని పార్వతిదేవికి గోలోక వాసుడైన శ్రీ కృష్ణుని వరంగా జన్మించాడని ఇంకా ఎన్నో కధనాలు మనం వివిధ పురాణాలలో గమనించవచ్చు.  ప్రతి గాధ మనకు ఒక సందేశాన్ని తెలుపుతుంది ఈ గాధలను తెలుసుకునే ముందు శివ మహా పురాణం లో  ఒక విచిత్ర సంఘటన గమనించవచ్చు

            పార్వతి పరమేశ్వరుల కల్యాణంలో బ్రహ్మ పురోహితునిగా ఉండి కళ్యాణ క్రతువును గణపతి పూజతో ప్రారంభించాడట. దీనిని బట్టి గణపతి శివ పార్వతుల కన్నా పూర్వం  ఒక  గణపతి ఉన్నాడని  తెలుస్తుంది.

 తరువాత పార్వతి పరమేశ్వరులకు ఒక గణపతి కలిగాడని స్కాంద పురాణం లోని వినాయక వ్రతకల్పం తెలుపుతుంది. దీనినే మనం వినాయక వ్రతలల్పం లో చదువుకుంటున్నాం. ప్రతి పురాణం వేద ప్రతిపాదితమైన గణపతి మూల తత్వాన్నే ప్రతిబిమ్బిస్తున్నది. బ్రహ్మ ప్రథమంగా పూజించింది ఆ మూల తత్వాన్నే. వేదం లో తెలిపిన ఆ గణపతి మూల తత్వాన్ని ఈ వ్యాసం ద్వారా తెలుసుకుందాం.

           గణపతి మూల తత్వాన్నే మహాగణపతిగా వేద సంభోదించింది. అటువంటి మహాగణపతి గురించి తెలుసుకునే ముందు దానిని తెలుసుకోవటానికి గల ఆవశ్యకతను తెలుసుకుందాం

           హైందవ సాంప్రదాయంలో ప్రతి కార్యక్రమానికి ముందు గణపతి పూజ చేయడం అందరికి తెలిసిందే, గణపతిపూజ లో ఒక పసుపు ముద్దను గణపతిగా భావించి పూజ చేస్తుంటారు. దీని వరకు ఎవరికీ గణపతి గురించి ఏవిదమైన ఆలోచన రాదు. కాని నా చిన్నతనంలో ఒక సందేహం వచ్చింది. వినాయక చవితి రోజున గణపతి పూజ సమయంలో వినాయక వ్రతకల్పం లో  మహా గణపతి పూజ అనంతరం సిద్ది వినాయక పూజ తెలపబడుతుంది. గణపతి, వినాయకుడు ఒక్కరే ఐనప్పుడు పెద్ద ఆకారంలో ఉండి తొండం, చతుర్భుజాలు, మూషిక వాహనం ఇత్యాదులు కలిగిన మట్టి తో చేసిన అసలు వినాయకుని వదలి ముందు, ఏ ఆకారం లేని పసుపుముద్దను పూజించటం లో గల అంతర్యాన్ని తెలుసుకోవటం ద్వారా వినాయకునికి మహాగణపతికి భేదాన్ని, సంభదాన్ని మహా గణపతి ఔన్నత్యాన్ని తెలుసుకోవచ్చు. మహా గణపతి గురించి వేదం లోని గణపతి మంత్రాలూ, గణపతి  అధర్వశీర్ష ఉపనిషత్తు విపులంగా తెలుపుతున్నాయి.

              ఋగ్వేదం లోని గణపతి సూక్తం లో మనం ఒక మంత్రాన్ని గమనించవచ్చు


           . ఈ మంత్రం గణపతిని " బ్రహ్మణస్పతి " అని సంభోదిన్చిది. ఈ మంత్ర నేపద్యాన్ని గమనిస్తే త్వష్ట పేరు  ధరించినటువంటి పరబ్రహ్మ సృష్టి లోని సమస్త గణాలకు అధిపతిగా బ్రహ్మణస్పతి నామం తో గణపతిని సృష్టించాడని వేదం తెలుపుతుంది.దీనిని బట్టి మనం విశ్వం లోని ఏ గణాన్ని తీసుకొన్నా అంటే దేవ గణాలకు మానవ, రాక్షస, జంతు గణాలకు, సూర్య, నక్షత్ర, గ్రహ గణాలకు ప్రతి గణానికి గణపతి గణాధిపతిగా ఉంటాడు.  

     గణేశ ఉపనిషత్ గణపతిని సృష్టి ఆది లో ఆవిర్భవించినవానిగా తెలిపింది 

      ఈ మంత్రం చివరలో గణపతిని సృష్టి ఆది లో ఆవిర్భవించినవానిగా ప్రకృతి పురుషులకంటే ముందు ఉన్నవాడిగా తెల్పింది. అంతేకాక ఈ జగత్తు సర్వం ఆయనలోనే జన్మించి, ఆయనలోనే ఉంది , ఆయనలోనే లయమవుతుంది అని, సమస్త దేవతల రూపాలు గణపతివే అని తెలిపింది. అంతేకాక గణపతిని త్రికాలకు త్రిగుణాలకు అతీతునిగా తెల్పింది. మరిన్ని విషయాలకు  గణపత్యథర్వ శీర్షోపనిషత్  లింకును చూడండి. 

               గణపతి నాలుగు యుగాలలో నాల్గు అవతారాలలో  ఉంటాడని పురాణాల ద్వారా తెలుస్తుంది 

కృత యుగం : మహోత్కట / వినాయక నామం : 10 భుజాలు : సింహ వాహనం : అదితి కశ్యపుల పుత్రుడు 

త్రేతా యుగం : మయూరేశ్వర నామం : 6 భుజాలు : నెమలి వాహనం : శివ పుత్రుడు 

ద్వాపర యుగం : గజానన నామం : 4 భుజాలు : ఎలుక వాహనం : శివ పుత్రుడు

కలి యుగం : ధూమకేతు / శూర్ప కర్ణ  నామం : 2 భుజాలు : గుర్రం వాహనం

         కలియుగంలో గణపతి అవతారం జరగలేదు కాబట్టి ముందు యుగమైన ద్వాపర యుగ గణపతి అవతరాన్నే పూజించాలని  వినాయక వ్రతకల్పం ద్వాపర యుగ కథనే వ్రతకథగా తెలుపుంది. 

                 అంతే కాక వేదం గణపత్యథర్వ శీర్షోపనిషత్

 గణపతిని "త్వం మూలాధార స్థితో సి నిత్యం " ప్రస్తావించింది. షట్చక్రాలలో మొదటిదైన మూలాధార చక్రం గణపతి స్థానంగా చెప్పబడింది మూలాధార చక్రాదిపతి గణపతి  తత్వం విఘ్నేశ్వరునిగా ఈ బ్లాగ్ లోనే నా నాద గణపతి వ్యాసంలో విస్తృతం గా చెప్పబడింది . గమనించ గలరు 

ఈ పోస్ట్ పై  మీ విలువైన సలహాలకు సవరణలు, సందేహాలకు వివరణలు తప్పకుండా ఉంటాయి 
Note: the red lettered words are from Lalitha sahasra nama strotram 

- : నాంపల్లి రామకోటేశ్వర్
గండేపల్లి